Cebuano news: Bukidnon gipa-ilawom sa 'General Community Quarantine'

MALAYBALAY CITY, Bukidnon, Marso 18 — Gi-permahan ni Governor Jose Maria R. Zubiri Jr. gahapong adlawa, Marso 17, ang Executive Order No. 13 (EO 13) nga nag deklara sa tibuok probinsya sa Bukidnon nga anaa kini ubos sa ‘general community quarantine’.

Ang pagsaka sa mga kaso sa COVID-19 dinhi sa nasud, ug pagsugod sa lokal ‘transmission’ sa Rehiyon 10, ingon man ang pag taas sa kaso sa mga natalang ‘Person Under Monitoring (PUMs) ug Person Under Investigation (PUIs)’ maoy naka hagit sa Provincial Task Force aron mohimo sa maong Executive Order.

Usa lamang kini sa gihimong lakang sa gobyerno aron malikay ug mapugngan ang pag kuyanap sa Coronavirus Disease (COVID-19) o kagaw dinhi sa probinsya.

Ang mga mosunod usa lamag sa mando nga nasulat sa EO 13:

1. Gidili ang pagsulod sa Bukidnon sa pampubliko ug pribadong sakyanan sa taga laing probinsya kung dili kini mopailawom sa ‘screening’ ug uban pang ‘protocol’ nga gihatag sa DOH isip giya;

2.Tanang may hilanat ideretso sa quarantine centers;   

3. Dili tugutan mosulod ang mamaligyaay ug isda, gulay gikan sa ubang probinsya nga naka motor o multicab;

4. Ang mga residente sa Bukidnon nga gikan sa ubang probinsya, pwede mosulod basta makapakita ug Proof of Residency;

5. Pwede makasulod, (kung may dalang ID) ang health workers, media personalities, empleyado sa gobyerno, police ug sundalo;

6. Ang pribadong sakyanan matugotan mosulod kung gamiton aron maghatud o magpalit ug tambal o supplies;

7. Adunay 12 ka mga Checkpoints nga mosuta sa health conditions ug impormasyon sa mosulod nga mga tawo/sakyanan sa Bukidnon;

8. Dakpon sa kapolisan ug sundalo ang dili mosunod sa kamandoan sa Article 171 sa RPC; ug  

9. Walay panagtigom nga itugot ug suspendido ang tanang klase.

Gimandoan usab ang tanan ilabi na ang mga Senior Citizen nga mag pondo sa ilang panimalay aron malikay nga matakdan sa maong kagaw. (Bernadith G. Epan/PIA-Bukidnon)

source https://pia.gov.ph/news/articles/1036683