Cebuano news: Gov. Zubiri 14-ka adlaw nga nagpa 'self quarantine'

MALAYBALAY CITY, Bukidnon, Marso 18—Ang amahan sa probinsya sa Bukidnon nga si Governor Jose Maria R. Zubiri Jr. mipa-ilawom sa ‘self quarantine’ sulod sa 14 ka adlaw kini human nag positibo sa Coronavirus Disease (COVID-19) ang iyang anak nga si Senator Juan Miguel Zubiri.

Sumala sa sulat mensahing gipadangat sa Gobernador pinaagi sa buhatan sa Public Affairs Information and Assistance (PAIA), naka desisyon si Gov. Zubiri sa boluntaryo nga ‘self quarantine’ sugod Marso 17 ug molungtad hangtud Marso 30, 2020.

Nanawagan usab ang Gobernador sa tanang katawhan sa probinsya nga dunay 'history of travel' sa bisan asang lugar kon diin positibo ang COVID 19, sa pagsunod sa gipatumang ‘self quarantine’ sa Department of Health (DOH) aron makalikay sa posibleng pag kuyanap sa maong kagaw.

"Ako kamo tanang gihangyo nga likayan sa ang pag lakaw-lakaw kung dili importante ang tuyo ug magpabilin sa atong panimalay sa tanang panahon aron mapugngan nato ang padayong pagkaylap sa maong sakit," miingon si Zubiri.

Gihangyo usab niya ang katawhan alang sa kooperasyon niining panahona ug gihagit ang katawhan sa makanunayong pag-ampo. (Bernadith G. Epan/PIA-Bukidnon)

source https://pia.gov.ph/news/articles/1036738