Cebuano news: 16-ka lungsod ug syudad sa Bukidnon nagkansela sa klase

MALAYBALAY CITY, Bukidnon, Marso 16—Nag kansela sa klase sa mga eskwelahan ang 14 ka munisipyo ug syudad sa probinsya sa Bukidnon, kini human nag deklara si Presidente Rodrigo Duterte ug 'Public Health Emergency' sa tibuok nasud.

Ang mga nag kansela sa klase mao ang mga mosunod; Malitbog, Talakag, Manolo Fortich, Libona, Sumilao, Malaybalay City, Valencia City, Maramag, Kitaotao, Kibawe, Pangantucan, Kalilangan, Quezon, Don Carlos, Kadingilan, ug Impasug-ong. 

Kini usa lamang ka inisyatibong gihimo sa mga Local Chief Executive aron malikay ang mga estudyante sa posibleng pagkuyanap ug pagtakud sa Coronavirus (COVID-19) o kagaw. 

Kini maoy pahayag sa mga mayor pinaagi sa ilang gipagawas nga Executive Orders sa tagsa-tagsa nila ka lungsod. Nag hangyo ang mga mayor sa mga estudyante nga mag puyo sa ilang panimalay hangtud sa pagbalik sa klase. 

Base sa tala sa Department of Health - Center for Health Development (DOH-CHD) sa Northern Mindanao kagahapong adlawa, ang Bukidnon dunay natala nga duha ka Patient Under Investigation (PUI) ug 10 ka Persons Under Monitoring (PUM).

Gipasabot sa DOH ang kalainan sa PUM ug PUI, ang Persons Under Monitoring (PUM) mao kining mga tawo nga naka byahi adto sa lugar nga naay kumpirmadong COVID-19 apan walay sintomas sa maong kagaw. Apan ang Patient Under Investigation (PUI) mao kining mga naka byahe sa lugar kon diin kumpirmado nga dunay COVID-19 ug dunay mga gibating sintomas. (Bernadith G. Epan/PIA-Bukidnon)

source https://pia.gov.ph/news/articles/1036680