Cebuano News: BISU, FabLab mitugya'g face shields batok COVID-19 sa mga ospital

TAGBILARAN CITY, Bohol, March 26 (PIA) -- Gitugyan sa Bohol Island State University (BISU) ug  ang Fabrication Laboratory (FabLab) ang unang hugna sa mga hinimo nga face shields ngatuyo nga gimugna aron magamit nga panalipod sa mga medical professionals nga nanguna sa pagbuntog sa coronavirus disease (COVID-19), Marso 25, didto sa FabLab Bohol.

Ang face shields, nga hinimo sa nag-unang fabrication laboratory ug incubation hub sa mga modernong ideya sa panghimo og mga imbensyon sa Bohol, maoy ika upat nga desinyo nga ilang namugna human sa tulo ka mga pagsuway.

VOLUNTEERS SA FABLAB. Pipila sa lima ka volunteers sa FABLAB Bohol nakahimo og sobra sa 100 ka face shields sa ika duha ka adlaw nila nga product development. Matud ni Jerome manatad, hepe sa Fablab, kini nga lima usa lamang ka trabahante aron ilang mamintinar ang kalidad ug ang social distancing. (rahc/PIA-7/Bohol)  

Una na nila nga gihimo mao ang paggamit sa digital printing sa face shield, apan dugay ug mas mahal ang minglugwa nga produkto, saysay ni Jerome Manatad, hepe sa Fablab.

Didto usab nila nabantayan nga mas barato ug mas paspas ang paghimo sa face shield kon kini gikan sa acrylic plastic nga hiwa-on pinaagi sa laser, diin ang usa  ka sheet sa acrylic plastic makahimo sila og 72 ka dugukan sa face shield.

Kon sa digital printing, mahimo ang dugukan sa lima minutos, usa ka minuto lamang mahuman na ang laser sa paghiwa sa plastic, dugang ni Manatad.

Ang unang midawat sa unang hugna sa 100 ka mga face shields  alang sa mga doctor ug nurses amo ang Gov Celestino Gallares Memorial Hospital kinsa nagpadala sa ilang mga resident physicians aron maoy modawat sa donasyon nga  gigastohan sa BISU ug Fablab.

Didto usab sa pagtugyan sila Dr. Regucivilla Pobar, Zita Saycon, Bernarda Villarojo ug si Provincial Disaster and Risk Reduction Management Officer Dr. Anthony Damalerio.

Gawas sa GCGMH, midawat usab sa susamang donasyon ang Clarin Community Hospital samtang sa sunod semana, magsugod na usab ang Fablab sa paghimo og dugang pang masks alang sa mga community hospitals ug rural health centers sa Bohol.

Ang Department of Trade and Industry, may giandam na nga mga materyales alang sa sunod nga hugna sa us aka libo kapin nga mga face shields, segun pa ni Jerome Gabin, coordinator sa DTI Shared Service Facilities apil sa Fablab.

Karon nga pananhon nga ang mga medical professionals nga naa nanguna sa pagbuntog sa sakit nga mananakod, ang paghatag kanila sa igo nga proteksyon, mao na ang usa sa mga labing maayo nga lakang suporta alang sa mga mingtahan sa ilang kinabuhi, alang sa komunidad. (rahc/PIA-7/Bohol)

source https://pia.gov.ph/news/articles/1037223