Cebuano News: Mga barato’ng gamit panalipod sa COVID gibutyag

TAGBILARAN CITY, Bohol, March 26 (PIA) -- Wala pa ma’y positibo nga kaso sa corona virus disease 2019 (COVID-19) sa Bohol, dili kini panahon nga magkompyansa.

Kini maoy kinatibuk-an nga mensahe nga gipadangat sa Provincial Health Office (PHO) sa Bohol pinaagi sa Health Education Promotions Officer II (HEPO II) nga si Vincent Apayor didto sa Kapihan sa PIA, Huwebes Marso 19.

SA PANAHON SA TINGNIHIT. Samtang lisud na nga mapalit ang mga face masks ug disinfectants, may mga sekto sa Bohol ang naghimo na lang sa ilang kaugalingon nga proteksyon sama sa tinahi nga face masks nga gigamit sa kapolisan sa Corella PS. (rahc/PIA-7/Bohol)

Sa Kapihan nga madungog sa usa ka oras gikan sa DyTR, gituki uban sa natumbok nga health educator, ang mga lakang nga mahimong buhaton ug sagopon sa ordinary nga mga tawo nga kasamtangan nga naa sa mga panimalay nga gipailawom sa self-quarantine.

Radio forum nga nagtuki sa mga kapili-an alang sa mga ordinaryo nga tawo nga dili makapalit sa mga gikinahanglang panalipod batok sa COVID, ang Kapihan nagtuki sa mga kapili-an kon wala nay ikapalit sa face masks, sa 70% alcohol  ug hand sanitizer ug sa disinfectant nga kasagaran mapalit sa commercial nga presyo.

Matud ni Apayor, ang coronavirus makalahutay nga naa sa yuta human kini madala sa laway sa panahon nga mangatsi, moubo ug mangluwa ang usa  ka tawo nga natakdan na sa sakit.

Kini nga kagaw, kon matumban sa tawo, mopilit sa sinelas ug sapatos, ug mahimo nga sayun rang mapasulod sa balay bisan pa kon nag-amping ang tanan nga dili matakdan.

Dala niini, tambag sa mga health professionals: mag-andam og disinfectant sa balay: ang pamahiran nga naa sa pultahan, humigon sa zonrox o chlorox, ug dinhi itunob ang sinelas ug sapatos kon buot nga patyon ang kagaw.

Kon walay ikapalit sa mas mahal nga zonrox o chlorox, matud ni Apayor nga mahimo nga maggama sa disinfectant pinaagi sa duha ka kutsara sa mas barato nga chlorine powder / granules, ug kon kini isahug sa duha  ka litro nga tubig, igo na kini nga mopatay sa kagaw.

Magbasa o maghumig og trapo gikan niining disinfectant solution ug maoy itrapo sa mga lamesa, lingkoranan, pultahan, siradora, pasamano ug sa mga butang nga sarang kahawiran sa tawo, aron mapatay ang kagaw nga mahimong tua na didto.

Sa alcohol, mahimo ra kayo nga pamuli ang sabon ug tubig aron ikapanghunaw, butyag ni Apayor.

Ang Alcohol, hand sanitizer ug liquid soap, parehas ra sa manghunaw sa tubig og sabon, ug kon sa bukid, wala sa tindahan ang 70% alcohol, daku og tsansa nga nay sabon.

Kabahin sa face mask, dili na kinahanglan kon naa ra sa balay ug walay sakit nga gibati.

Gani, ang N95 nga face mask, gitagana lamang gayud unta sa medical professionals nga nakig-atubang sa mga may sakit, ug ang ordinary nga surgical face mask, igo na nga proteksyon batok sa kagaw.

Hinuon, mahimo ra usab ang cloth masks, nga sayun ra nga himoon, basta duna lay noog ug guma nga ikahikot niini sa dunggan sa tawo.

Usab, nanawagan ang PHO pinaagi ni Apayor ngadto sa mga Bol-anon nga magpabilin nga magmabinantayon aron dili makasulod dinhi ang sakit ug magpabilin ang lalawigan nga luwas poy-an. (rahc/PIA-7/Bohol)  

source https://pia.gov.ph/news/articles/1037222