Cebuano news: Curfew sa Iligan hugot nga gipatuman tungod sa COVID-19

ILIGAN CITY, Marso 23 (PIA) – Hugot nga gipatuman sa Iligan City ang curfew aron mapugngan ang pagkaylap sa 2019 Coronavirus Disease (COVID-19).

Gipirmahan ni Mayor Celso Regencia ang Executive Order No. 30 nga nag langkob sa pag patuman sa curfew sugod alas 9:00 sa gabi-i hangtod alas 5:00 sa buntag sukad niadtong Marso 17, 2020.

Dili apil niini ang mga miyembro sa Philippine National Police, Philippine Army, Marine, Airforce, Coast Guard, Fire department, medical personnel, Philippine Red Cross, mga opisyales sa barangay ug mga ‘responders’.

Gisuspinde usab ang operasyon sa mga “mall” sugod niadtong Marso 19.

Ang mga tindahan, mga parmasya, ug hardware walay labot niining gipirmahang balaod.

Matud pa sa city government, ang ubang mga establisyemento nga namaligya sa mga kinahanglanon sama sa pagkaon ug tubig (gawas sa mga mall) gitugutan nga mag-abli, kung sila magpatuman sa mando sa gobyerno nga ‘social distancing’.

Gideklara ni Regencia nga ipailawom sa "community quarantine" ang Iligan City kaniadtong Domingo aron hingpit nga bantayan ang mga mosulod nga tawo ug mga sakyanan aron mapugngan ang pagkuyanap sa ‘local transmission’ sa COVID-19.

Gimando usab niya ang pag kansela sa mga pampublikong kalihukan ug pag tambong sa mga aktibidad nga nag langkub ug daghang tawo sama sa pagsimba. (BGEpan/ PIA-Bukidnon)

source https://pia.gov.ph/news/articles/1036838