Cebuano news: 'Kampanya batok UXO, IEDs gipahigayon sa Marawi

MARAWI CITY, Marso 23 (PIA) - Ang Swiss Foundation for Mine Action (Fondation Suisse de Déminage, FSD), usa ka non-government nga organisasyon nga nalambigit sa 'mine action', naglusad ug ‘educational campaign’ sa ‘unexploded ordnances’ (UXO) ug ‘improvised explosive device’ (IEDs).

Ang Community Liaison Officer nga si Merlene Degay miingon nga ang ilang organisasyon naninguha aron maka luwas ug kinabuhi ug mapanalipdan ang katawhan gikan sa peligro sa mga UXO ug mga IED.

Ang FSD kauban ang mga boluntaryo gikan sa Department of Education sa Marawi City Division, nagpahigayon sa sunod-sunod nga educational campaign sa evacuation center sukad pa sa tuig 2017.

Sa wala pa nag bisita ang mga residente sa ilang panimalay nga naa nahimutang sa labing  apektadong lugar kon ‘most affected area’, pinaagi sa 1st Kambisita (pagbisita), ang mga boluntaryo sa FSD ug DepEd maoy nangulo sa mao’ng kalihukan.

Gipadayon ang ‘risk education campaign’ samtang ang Task Force Bangon Marawi nagpabalik sa Kambisita sa ika-3 nga higayon aron tugotan ang ubang mga tag-iya sa balay nga mobisita sa ilang mga kabtangan.

Gipaambit ni Normina Mama nga siya ug ang iyang mga kauban nga magtutudlo gibansay sa FSD sulod sa 15 ka adlaw batok sa kapeligro sa mga UXO ug IED. Karon, nagtrabaho sila isip mga boluntaryo alang sa hapsay ug maayo nga pagpahigayon sa ‘information campaign’.

Dugang pa ni Mama nga nagsugod ang kampanya sa mga bata isip target nga tigpaminaw hangtod nga ilang gi-apil ang mga ginikanan.

"Prayoridad namo ang pag-edukar sa mga estudyante aron makakita sila sa usa ka UXO o IED, kinahanglan nga dili sila moduol, dili kini hikapon ug ireport kini sa ilang mga ginikanan," miingon si Mama. 

Nagpasalamat usab si Hanan Salacayan, usa ka estudyante gikan sa Lake Lanao National High School tungod kay daghan kaayo ang iyang natun-an.

“Daghang salamat sa paghatag kasayuran sa amo tungod kay bisan sa mubo nga oras daghan kami ug nahibal-an," matud ni Salacayan.

Gipasabot usab ni Salacayan nga iyang ipa-ambit ang iyang nahibal-an alang sa kasayuran sa ubang tawo ug sa iyang pamilya. (BGEpan/PIA-Bukidnon)

 

source https://pia.gov.ph/news/articles/1036841