Cebuano news: LDS IPHO naghangyo nga dili motuo sa COVID 'fake news'

MARAWI, Lanao del Sur, Marso 23 -- Gi-awhag sa Integrated Provincial Health Office (IPHO) Lanao del Sur ang mga residente ug uban nga mga kasikbit nga lungsod sa probinsya nga dili motuo diretso ug likayan ang pagpakaylap sa mga balita nga walay basehan kabahin sa Coronavirus (COVID-19) nga sakit.

Ang hepe sa IPHO-Lanao del Sur nga si Allen Minalang miingon ug nanawagan sa publiko nga kinahanglan mokuha kita ug impormasyon gikan lamang sa mga awtoridad sama sa DOH, WHO ug Local Government Unit ug dili basta basta nga mutuo sa mga gipang post sa social media.

Mao kini ang panawagan sa IPHO sa publiko human dunay dili mao nga impormasyon nga nigawas sa facebook nga adunay tawo nga niagi ug mga test nga nag positibo sa COVID-19 nga na admit sa Mindanao State University Infirmary ug nagpatuman ug 'lockdown' sa tibuok lugar.

Miingon usab si Dr. Minalang nga kadtong dunay diretso nga kontak sa nagpositibo sa COVID-19 gi-abisuhan nga magpondo sa balay sulod sa 14 ka adlaw.

Usa sa mga lakang sa IPHO nga gihimo mao ang pagpangampanya ug pagpahibalo sa katawhan kung unsay angay buhaton aron mapugngan ang pagkaylap sa COVID-19 sa maong probinsya.

Niadtong March 12, 2020 walay nag positibo nga kaso sa Lanao del Sur pero adunay usa ka tawo nga anaa ubos sa imbestigasyon nga anaa sa Amai Pakpak Medical center (APMC)

Sa niaging mga adlaw adunay duha ka tawo nga gimonitor ug usa ka tawo ubos sa imbestigasyon pero nigawas ang resulta nga negatibo kini sa COVID-19

Mi-abiso usab si Dr. Minalang nga kung adunay sintomas sama sa hilanat ug panakit sa lawas kinahangalan magpakonsulta dayun sa doktor o mo-kontak sa mga mosunod nga numero sa IPHO ug APMC 09062902061 ug 099919094881/09955632722. (ZDJagudilla/PIA-Bukidnon)

source https://pia.gov.ph/news/articles/1036839