Cebuano news:196 ka Pilipino nga niadto'g Malaysia nailhan na sa BARMM

MARAWI CITY, MARSO 24 (PIA) — One hundred ninety-six (196) sa 215 ka mga Filipino-Muslim ang nag tambong sa Tabligh (Islamic preachers) nga panagtigum sa Malaysia ang nailhan na sa Bangsamoro Autonomous Region in Muslim Mindanao Inter-Agency Task Force on COVID-19 (BARMM-IATF).

Ang panagtigum, gitambongan sa kapin 16,000 ka mga tawo nga  gipahigayon niadtong  Pebrero 27 hangtud sa Marso 1, sa Jamek Sri Petalling Mosque. Gi-report nga nahilambigit kini sila sa pagdaghan sa kumpirmadong kaso sa COVID-19 sa Malaysia.

Si Asnin Pendatun ang tigpamaba sa gabinete sa BARMM ug sa IATF miingon atol sa usa ka press briefing kaniadtong, Marso 23, nga ang Task Force matud pa pwede nang makakuha ug passport para sa mga tawo nga gikonsidera nga Persons Under Monitoring kon PUM.

“Apan kinahanglan nato ang pag-validate sa tagsa-tagsa  tungod kay dili kini tanan taga-Pilipinas ug taga BARMM. Dili pud ang tanan naka-uli sa ilang puloy-anan. Ang uban naa pa sa Malaysia," ingon ni Pendatun.

Miingon siya nga "Ang importante naay ilang mga ngalan ug numero sa passport, kini usa ka dakong tabang aron ma- ‘track’ sila."

Istriktong gi-monitor sa taga IATF ang 35 ka mga tao nga nag puyo sa BARMM, human sila ma identify.

"Diha sa pagsubay sa ila, kadaghanan gyod ‘asymptomatic’. Busa naka-quarantine sila sulod sa 14 ka adlaw,” ingon ni Pendatun

Matud pa sa report nga ang 16 sa 215 ka mga indibidwal kuno ang positibo sa COVID-19, si Pendatun miingon,

"Wala pa kami’y opisyal nga pahayag gikan sa Department of Health. Busa dili pa namo makumpirma. Amo pa kining ipa-validate sa mga awtoridad,” dugang niya.

Sa pagkakaron, ang Ministry of Health (MOH) nakatala sa kinatibuk-ang 157 ka mga PUI ug 5,112 ka mga PUM sa tibuuk nga rehiyon sa Bangsamoro.

Ang probinsya sa Maguindanao naay 20 ka mga PUI ug 1,331 ka mga PUM; Lanao del Sur ug Marawi City dunay 27 ka PUI ug 1,489 ka PUM; Basilan ug Lamitan City naay 34 ka PUI ug 985 ka PUM; Tawi-Tawi 9 ka PUI ug 584 ka PUM; ug Sulu nga dunay 40 ka PUI ug 630 ka PUM.

Ang Ministry of Health (MOH) nakarekord usab ug duha nga nakumpirma sa COVID-19 nga kaso sa rehiyon, lakip ang usa ka pasyente gikan sa Amai Pakpak Hospital sa Marawi City ug Northern Mindanao Medical Center sa Cagayan de Oro City. (Zenaida D. Jagudilla/PIA-ICIC)

source https://pia.gov.ph/news/articles/1037125