Hiligaynon News: PNP 6 nagpahanumdom sa kapulisan sa pag-amlig sa ila ikaayong lawas

ROXAS CITY, Capiz, Marso 24 (PIA) – Ginpahanumdon ni Police Regional Office 6 director Brigadier General Rene Pamuspusan ang mga kapulisan nga amligan sang mga ini ang ila ikaayong lawas.

Sa pagsekyar ni Pamuspusan sa mga kapulisan kag iban pa nga mga katapo sang gobyerno nga nagapatigayon sang border checkpoint sa Aglalana, Dumarao, Capiz kahapon, Marso 23,  iya ginpanugyan sa mga kapulisan nga siguraduhon nga maayo ang ila ikaayong lawas bangud sila ang isa man sa mga grupo nga nagarisgo sang ila kabuhi bilang fronliner bangud sa Corona Virus Disease 2019 (COVID-19).

Suno sa iya nga samtang ang kapulisan nagapatigayon sang ila responsibilidad para mapasiguro ang kalinong kag katawhay sa Rehiyon, dako man ang risgo nga malatnan sila sang amo nga sakit.

Ginpanugyanan man ni Pamuspusan ang kapulisan sa pagpadayon sa pagserbisyo nga may pagsakrispisyo kag pagpasensya bangud ang ila tampad nga pagserbisyo ang makapaayo para sa kadamuan  

Sa mga pulis nga may ginabatyag sa ila ikaayong lawas o kon may nahibaluan nga may nagapakita sang sintoma sang COVID sa ila hanay, kinahanglan nga indi indi pagtaguon o hipusan, apang gilayon ipahibalo sa ila hepe para mahatagan sang nagakadapat nga solusyon.

Sa karon, suno pa sa iya, wala sila sang may nabaton nga report tuhoy sa mga kapulisan sa Western Visayas nga may sintoma sang amo nga balatian.

Magapapanaog naman ini sang direktiba sa mga pulis nga yara naka duty sa mga lugar nga may kompirmado nga kaso sang COVID para sa ila siguridad sa ikaayong lawas.

Maluwas sa Capiz, nagpadulong man si Pamuspusan sa probinsya sang Aklan kag iban pa nga mga probinsya sa rehiyon 6 para sa pagsekyar sa mga kapulisan ilabi na sa maga nagapatigayon sang border checkpoint. (JBG/PIA6)

 

source https://pia.gov.ph/news/articles/1037008